2024年11月4日星期一

三ッ峠 開運山

雲上之富士山@三ッ峠山莊

 三ッ峠 開運山 1785M
秋季登山
難度: 易
時間: 5小時(連lunch/打卡) 10KM

今日東京還是天清氣朗, 所以又係去行山, 一早出發坐JR去東京駅, 食過麥記早餐後, 坐早上7點多出發的高速巴士前往富士山河口湖, 9點過點便來到河口湖駅前, 今日適逢日本文化日假期, 所以駅前巴士站早已大排長龍擠滿觀光客, 而每日只有朝早一班前往天下茶屋的巴士更早已有大班full gear日本行山友在排隊等車, 本來還有點擔心巴士夠不夠位接載咁多乘客, 結果巴士剛好把所行山友都塞進車廂裡, 巴士經過富士山纜車站時只見排隊等纜車的遊客長龍一路排到公路邊上, 還有不少遊客租單車沿著河口湖的公路努力地踩單車, 真係辛苦晒了

富士山@天下茶屋

天下茶屋, 御坂隧道

 巴士上山後來到三ッ峠登山口, 差不多所有乘客都在這裡下車出發登山, 但我就多坐一站至總站的天下茶屋才下車, 位於御坂峠隧道旁的天下茶屋真是一家茶屋來, 戰前昭和初年日本大文豪太宰治曾在這家茶屋待了3個月並寫了本小說富岳百景, 咁難得一場嚟到, 點都要去茶屋幫襯吓沾染一下昔日大文豪嘅風雅, 望住雲海上嘅富士山食吓茶點嘆杯咖啡先再去行山

御坂峠 天下茶屋, 11月初山上已換裝了秋色

喺日本嘅假日都遇到些電單車發燒友組隊遊車河

在茶屋可以一邊吃點心一邊欣賞富士山

在茶屋食過茶點, 便沿著公路走約20分鐘返回三ッ峠登山口巴士站, 登山口的樹林停車場早已泊滿了不少縣外來的車輛, 想來一大早便有大批的行山友從東京等地開車過來行山兼賞高山早來的秋色, 行了一會遇到一位日本姐姐騎著重機車問路, 想是要去天下茶屋再走御坂峠隧道, 結果在登山口巴士跟著前來行山的車尾走錯路, 雞同鴨講下指她回去巴士站再轉左上山, 其實一個女子開著車在異地的深山老林裡迷路, 也是挺嚇人的.

從天下茶屋走回三ッ峠山登山口

入山林道

登山口前的樹林成為了免費停車場

本田小狼輕機車 Honda Super Cub, 現已停產

從登山口停車場沿著一條破爛的廢棄車道上緩緩上山, 行約一小時左右便會來到三ッ峠山莊, 在山莊前面的觀景台遇到一個法國仔, 身穿著一件施丹波衫, 腳踏波鞋, 手上拿著一根樹枝充當行山杖, 背著個小背囊, 帶著一張觀光登山地圖從自纜車站那邊山腳一路走過來, 雖說我的登山行裝已是十分輕便, 起碼還是正正式式穿著行山鞋和帶著一根伸縮登山扙, 但是和法國仔相比可真是相形見絀, 法國仔之後要走回河口湖, 我就會沿著開運山的參拜道下山去浸温泉, 吹了一會水後就此別過

登山口到山頂山莊一路都是Z字形緩緩上坡的廢棄車道, 現在只有山上民宿的越野車才會使用

山頂觀景台望向雲上的富士山, 今天在河口湖的遊客運氣不太好, 在雲層底下睇唔到富士山

山下就是西桂町, 可以見到山谷中的富士急行線及民居
 
三ッ峠山莊

山屋外的露天餐枱, 可以同朋友對著富士山開餐吹水

山屋的野菜soba, 味道一般, 不過風景一流

跟著走到三ッ峠山莊, 可以觀望富士山和河口湖的戶外長枱座位上, 已有些早來的日本行山友進佔有利位置拿出精緻的露營灶具在煮午餐(又係合味道咖喱杯麵?), 我就到山莊幫櫬了一碗soba拿到外面吃, 叫做支持一下山屋小店, 之後經過另一家山屋四季樂園和一家已關門大吉的富士見山屋來到三ッ峠山頂打卡, 找來找去都找不著標高柱, 原來是被一班較早來到講普通話的後生仔女圍起來放背囊, 怪不得一眾稍遲到來的日本行山友找不著標高柱來打卡交功課

山頂上另一家山屋, 四季樂園, 門前停著民宿的越野車

三ッ峠山頂, 頂上有巨形白色板及無線電天線, 下面的巨形石壁是日本著名嘅攀石聖地屏風岩

咁大塊白色板! 梯級上面便是三ッ峠山頂

打卡位: 三ッ峠 + 富士山

雲上之富士山@三ッ峠山頂

之後就沿著開運山參道下山, 先會經過一大片岩壁底下的山徑, 一路上遇到些日本人在屏風岩玩攀石, 之後便是普通的林間山徑下山, 走了個多小時便來到山腳的登山口, 往後都是水泥車道一路走到村莊裡, 可以坐富士急行電車返回大月, 再轉JR回東京

落山先要經過一面巨形的崖壁屏風岩

在屏風岩玩攀石的日本人

三ッ峠山開運山以前曾是佛教聖地, 經過山崖石壁便會遇到八十八大師坐佛

話咁快又落到山腳, 不過仲有一大段車路才出到西桂町的民居

開運山車道兩旁嘅樹林在秋季時會成為賞楓聖地, 睇嚟之前試過有些一般遊客行多咗上山遇難

中途經過外觀造形奇特嘅廁所, 點都要試吓炮

 天黑前來到山下西桂町的村莊, 一入村便見到一間三ッ峠Green Center的町營渡假村, 在外面便見到大大的網球場, 除了可以宿泊外, 還有最要緊的日帰温泉及食堂, 咁就當然要浸埋温泉食埋晚飯先行返出去坐富士急行電鐵回東京 

是日晚餐

剛到接待處便被大叔問我係咪登山pass? 咁我當然是一頭霧水, 只係回答要日帰温泉就畀錢, 咁浸完温泉出到食堂叫埋晚餐定食, 先見到牆上貼著登山pass的poster, 原來係日帰温泉+小食+啤酒+專車送返電車站嘅全包package, 在食堂又見到剛才在山上同路落山嘅兩位日本大哥大姐獨行登山友都係浸完温泉出嚟坐係度嘆啤酒再食埋晚餐, 咁睇落都幾抵吓, 不過我温泉已浸, 晚餐定食已落單, 冇得後來再改單了, 只好早D食完飯摸黑行多兩步去電車站, 有登山Pass的行山友就可以坐多陣再坐專車直送去車站.

返到上野, 再去吃碗六厘舍沾麵

 

沒有留言:

發佈留言