2018年5月26日 星期六

荒島岳 (日本百名山)

荒島岳
1523M
百名山
福井 越前大野
初夏登山
時間: 6小時 (連休息)
難度: 中, 全程直上直落, 登山落差1200米, 要有充足體力

2018年5月尾去咗福井荒島岳登山, 從京都坐JR在來線快速列車轉咗幾次車先到福井, 中途可在長浜/敦賀遊覽同食飯, 雖然比坐特急稍為多花點時間, 但可以中途落車遊覽及食飯休息, 仲要比坐特急來回平近一半, 又無必要買JR北陸pass咁貴.

早一日到福井在獨此一家的民宿入住, 第二天清早老闆開車送我到福井駅, 坐6:30AM出發的電車到越前大野.
6:30AM發車的越前大野-九頭竜線(越美北線)
紅色的單卡電車...應該係柴油火車, 清早只有幾個乘客
火車7:30AM到達終點越前大野, 如要從福井坐火車直達荒島岳登山起點的勝原駅, 就要等到9AM先有火車, 10:30AM先到, 咁就唔夠時間行完山再到越前大野遊覽, 所以先坐首班火車到越前大野, 再轉乘地區巴士到勝原駅
越前大野以泉水聞名, 城區有些泉水可供飲用, 咁當然裝返D天然泉水一陣行山飲
所謂地區路線巴士其實是一架面包車, 8AM出發, 8:20AM左右到勝原, 今早只有幾個乘客, 上車時司機伯伯問各乘客係邊度落車同收車資, 只有我同一個日本大叔係去勝原行山, 另外有兩個大叔拿著魚杆, 應該係中途其他站落車去九頭竜川釣魚
係勝原駅落車, 要沿著林間車道走回公路先到登山口, 中途行經林間車道時, 竟然老遠見到前路有一隻小黑熊, 熊仔見到有人即時跑回路旁的森林裡, 有熊仔, 即係有熊媽啦! 咁我就企定定等埋後邊的日本大叔, 同佢講剛才見到熊出沒, 先一齊行去公路, 多個人行應該會安全D?

來到勝原登山口, 見到停車場已泊滿車, 仲有大班日本大叔師奶行山友排隊去廁所同寫登山届準備出發, 咁我見到停車場有販賣機, 見今日咁熱, 又買多支凍水上山
搞吓搞吓, 8:40先正式從勝原登山口起行, 一開始便是一條筆直的斜路, 聞說以前勝原有一個滑雪場, 所以仲有一片大斜坡留係度, 後來有些義工自資修建了一條水泥路方便行山友
大直路一路上斜中
水泥路終點開始是普通山徑, 往下望可見起點的停車場和民宿,山坡上仲有個阿婆係度摘野菜
行咗約半小時山路就會經過以前滑雪場索道的轉盤遺跡
之後先至係荒島岳登山口9:15AM
跟著行咗半個小時山路來到山腰,有一處展望點可以看到白山, 不過俾樹遮晒, 乜都睇唔到
沿路係不停咁上坡山徑, 不時係這種樹根梯級
10:40AM從登山口出發不停的爬坡, 行咗大約1小時左右來到海拔1204M高的分歧點, 一邊往小荒島岳同[中出]登山口,一邊往荒島岳主峰, 距離山頂仲有1.5KM
路標~唔好睇錯成[山頂中出]
滑落注意!
有些山徑比較陗陡, 要用手拉著鐵鏈爬上去
11:20AM從剛才的分歧點行咗約半小時終於走出樹木線, 見到山崚線, 山坡上仍有殘雪未溶
仲有412M就到山頂呀!
從山徑回望, 可見遠方白色積雪的白山
11:30左右來到山頂的小神龕
從荒島岳山頂可以看到山下的越前大野平原
山頂上起碼有過百人在休息午餐, 應是一早開車過來登山,當中主要都是年青男生, 至於阿伯師奶行山團仍在後面努力登山中
有人仲帶埋小朋友嚟行山, 假日親子行山樂
荒島岳 1523M, 前方是白山
山頂上大班行山友在野餐中, 不亦樂乎
12PM開始落山
沿來路下山, 今日天色不錯, 登高望遠, 只係烈日當空, 日曬下意想不到咁熱, 汗好雨下, 好在先前在山下多買了支凍水
又見到剛才的路牌~中荒島岳1420M
行咗約2小時, 話咁快又回到起點上山的大直斜路, 彈吓彈吓就追過前面的日本哥仔回到停車場. 先前係山徑落山時日本哥仔健步如飛, 從後一嘢就過咗我, 咁係大直路見我彈吓彈吓咁快步落山, 不知如故佢又跑起來衝落山, 點知開跑咗幾步佢就一個不小心PK了, 啪一聲扑倒在石屎路面上顏面落地, 跟住好似乜事都冇發生過咁彈返起身, 見到都痛死人.
出咗停車場後沿著公路走回勝原駅, 中途有一處高速公路鑽隧道的工地, 有新海誠設計的廣告牌, 工地門口的保安大叔認得我剛才經過, 仲同我打招呼, 阿叔我唔識日文, 口啞啞唔識點應機
2:30PM 勝原駅等火車回越前大野
2:45PM 又係今朝架紅色火車, 上咗車又遇到今朝一齊落車行山嗰位日本大叔, 不過佢係另一邊落山, 早一個站越前下山駅上火車
在火車內回看荒島岳
火車沿著筆直路軌越過越前大野鄉郊
下午3點左右返到越前大野駅
同其他日本鄉下城鎮一樣, 街上人影都唔多過, 一路行到市中心一間coffee shop食個cake set, 扮吓文青嘆返杯凍珈琲先
今日突登預留時間去越前大野, 係専登去南部酒造場的花垣買清酒, 大野以地下泉水聞名, 當地釀造出不少高質的日本清酒
因為時間關係, 今日冇時間走爬山上去越前大野城, 回到火車站時經過一間神社, 裡面有D好得意的狗仔繪馬
坐恐龍火車返福井4:50PM
坐恐龍火車返福井4:50PM
不過係中途落車, 去某鄉下浸温泉先再返福井
JR市波駅, 之後要行路20分鐘左右去美山森林温泉, 個温泉真係喺森林裡邊, 一邊浸一邊望住樹林, 好過癮吓.
晚上8點左右返到福井, 連月台地下等車的劃線都以恐龍為主題
跟住係駅前商店街的食堂食返個唐揚定食當晚餐, 抵食夾大件, D炸雞仲好好食
是日收獲: 花垣大吟醸40, 好正!
(p.s. 2019年一田都有得賣, 不過嚟到香港就貴一倍有多)


是日開支:
JR 福井 越前大野 670
巴士 越前大野 勝原 400
JR 勝原 越前大野 240
cake set 1020
花垣大吟醸 1296
JR 越前大野 市波 320
美山森林温泉 510
JR 市波 福井 320
晚飯定食 900

注意事項:
 越美北線到九頭竜湖一段的車次疏落, 請查明巴士及列車班次
荒島岳登山上下落差甚大, 甚耗體力, 請帶夠糧水, 及請預計6-7小時方能行畢全程
 如利用JR前往荒島岳登山, 可利用勝原駅及越前下山駅進出
 勝𠩤駅有前往白山及九頭竜湖的巴士來往越前大野駅
 越前下山駅旁有九頭竜温泉, 係日本秘湯
越前大野以泉水聞名, 除了買清酒外, 市內也有錢湯以可浸浴

2018年5月25日 星期五

長浜 洋馬博物館

長浜一日遊
旧長浜駅舍鉄道資料館
慶雲館
洋馬博物館
黑壁廣場

從京都到福井途中到長浜市一遊, 在明治時期長浜是東海道鐵道主要渡口, 火車從東京來到琵琶湖邊後, 乘客及貨物會轉乘渡船橫過琵琶湖到西岸的近江及北岸的敦賀, 再繼續前往關西及坐船往俄羅斯, 及後東海道鐵道連接米原及京都大阪的軌道建成後, 長浜才由繁忙的鐵路渡口變成一個寧靜的中途小車站
 旧長浜駅舍鉄道資料館
 旧長浜駅舍鉄道資料館內打卡位
 旧長浜駅舍鉄道資料館上層的Tomy火車仔遊樂場, 啱晒小朋友嚟玩
 
蒸氣火車頭
 旧長浜駅舍鉄道資料館後邊的慶雲館, 明治時期長浜富商出資興建的迎賓館, 曾接待明治天皇皇后, 現為國定史跡及指定名勝
 慶雲館內庭園
 慶雲館內庭園及本館
 從本館二樓外望, 一片綠意盈盈
 從本館二樓外望下面的日式庭園
 二樓的大廳
 二樓大廳的瑞鶴門畫
已有60年歷史的長浜盆梅展, 值得一看
 今日的主角, 長浜 Yanmar Museum 洋馬博物館, 2018年閉館重整, 於2019年底重開
 洋馬公司的標志
  農用拖拉機
 稻米收割機
 稻米收割機
 迷你堆土機
 用迷你挖土機玩波波池, 仲有退休職員教你點操作, 好好玩
 迷你挖土機
 其實洋馬的本業係開發製造小形柴油引擎
 展示機械精密部件制作
 展示機械精密部件制作, 引擎燃油的注入噴嘴?
 內燃機的模具?
 引擎成品
 洋馬仲有做小形船隻, 如遊艇及漁船, 仲可以玩模擬駕船
挑戰自我發電
水上用小形引擎
 天台仲有個環保節能水循還系統
 初代內燃機, 祝來館者50萬人達成
 初代小形横形水冷內燃機, 已是歷史文物了, 日本的工業基礎自明治維新工業實業研發開始
 午餐, 在地名食, 亲子丼
 下午去長浜市的黑壁廣場閒逛, 和菓子店
 黑壁廣場的古屋商店, 商店以玻璃制品及手工音樂盒出名
 下午茶
 之後又到琵琶湖邊的長浜公園, 在長浜國民宿的太閣温泉泡湯, 長浜城
 午後的琵琶湖
 JR長浜駅, 泡完温泉就坐JR到福井
音樂盒手信

是日使費:
旧長浜駅舍鉄道資料館 300円
慶雲館 300円
洋馬博物館 600円

注意事頂:
如乘坐JR前往長浜, 盡量選乘快速列車到米原, 以節省行車時間及車資