由布岳

由布岳

由布岳

九州 湯布院 

高:1580M 

路程/上落:7KM/700M+

需時:4.5小時 

難度:易 

四月中旬, 春暖花開日, 又是賞花行山之時

粉蝶花/瑠璃唐草 @大分農業文化公園

冰島罌粟 @大分農業文化公園

紫藤 @千財農園

今次難得同朋友玩自駕, 在別府住了幾天, 開頭3日都落雨, 唯有遊吓車河行吓商場食吓好西, 去遊花園賞花浸吓温泉, 等到第四天冇雨落先去行山

難得天色放晴, 一早開車到海拔800M左右的由布岳登山口停車場, 泊好車就開始行山, 雖然今早終於違久地出太陽, 但是由布岳大半都躲在雲層裡, 剛起行時高原草地上吹著狂風, 要穿上風褸擋風, 不過行咗15分鐘來到山腰林區開始上斜, 就熱到除剩件短䄂T恤

由布岳登山口

雨過天青, 藍天白雲青翠山野, but由布岳在雲霧中

綠草如茵 + 人在野feel, 向山出發

在林間山徑行了好一會就到達雲線, 之後就在雲霧中慢行登山, 從停車場起步計不用2個鐘就上到山頂東西峰的分歧山口, 在山口找個背風位食條士力架朱古力充下電, 本來想上較高的西峰, 不過先要拉著鐵鏈爬上2-3米高的石壁, 在猛烈狂風加上岩石濕滑, 兩位大叔還是量力而為安全至上, 改去易行的東峰好了

過了草坡就在林道雲霧中登山

話咁快就上分歧口

在五里霧中登上東峰途中

話咁快就到山頂, 由布岳東峰1580M

上到東峰當然還是在一舊雲之中, 在雲霧中打過卡食埋條Mars朱古力就沿路落山, 行吓行吓近山腰的雲霧開始消散, 可以見到下面的登山口及湯布院温泉, 回程時經過山腳的草丘, 在陽光雲霧的光影下有如Win XP的Wallpaper

 

由東峰落山, 雲層漸漸散去, 可以見到山下嘅湯布院

行到雲線底下

今日湯布院天氣, 天晴

Win XP Wallpaper(少似)

大約1點回到停車場, 這時來了幾輛旅遊巴的團體客在登山口打卡, 只是山腰以上過半還在雲霧中, 因為要趕在下午4點還車, 我們開車到山下湯布院食lunch咖喱烏冬, 再去浸返個日帰温泉, 3點左右開車返回別府經過登山口停車場, 山上的雲層差不多都散去, 終於見到由布岳的全貌, 當然又要停車打下卡, 到此一遊

咖喱烏冬 @湯布院

下午回程終於見到由布岳山頂(微雲)

行完山, 返去別府嘆返杯手沖咖啡

晚餐食寿司 

仲有天婦羅

宵夜食油麵

之前多次到日本行山, 有好幾次都是上到山頂一舊雲如入五里霧中, 可惜今次同行友人遇上天氣欠佳一舊雲, 希望下次有機會能在天清氣朗時登山, 會當凌絕頂, 一覽眾山少, 又會是另一番風光 

第二朝別府坐巴士返福岡機場, 等巴士時幫襯星巴巴, 價錢係香港一半, 竟然仲係用玻璃杯, 有成十幾年冇見過星巴巴嘅玻璃杯了, 𥿄杯膠杯又cheap又唔環保, 畀返玻璃杯我!