2018年11月29日 星期四

大井川鉄道, 蒸汽火車遊

大井川鉄道
上午坐蒸汽火車
下午返静岡去睇模型

早上係珈琲店食過早餐, 就坐JR到金谷, 今日係去坐大井川鉄道的蒸汽火車
 大井川鉄道金谷駅, 點解會見到Thomas & Friends?
 要坐普通電車先到新金谷, 換乘10:38AM出發的蒸汽火車, 剛才係金谷買蒸汽火車急行乘車券(800円)時只有幾個日本遊客, 來到新金谷就見到大班日本遊行團等上火車, 成班人圍住架蒸汽火車頭係咁影相打卡
 蒸汽火車頭的駕駛室, 新=新金谷, 大鐵=大井川鉄道
 散客要走到最尾的車廂乘車, 話就話係急行, 係中途飛咗幾個站, 但行車時間唔會快過普通電車
 保特原貌的昭和時代車廂, 沒有冷氣, 只有電風扇, 幸好現在是秋未, 因為蒸汽火車燒煤, 過隧道時黑色的煤煙可能會跑進車廂, 所以列車的窗戶全關, 要是在盛夏酷暑時坐蒸汽火車, 等於在烈日下坐進只靠電風扇吹風降温的鐵箱子裡焗桑拿
 鄰座係兩名日本女生, 終於唔係大叔師奶, 行車時會有乘務員拿著列車號+日期牌子及鐵道員的帽幫乘客影相, 咁當然之後要俾錢買相, 坐我前面的一家三口, 爸爸同小女兒好開心咁影咗相, 不過之後乘務員姐姐拿著印好的照片過來兜售時, 個女睇完好開心好想要, 但係爸爸話唔買, 搞到個女發脾氣, 係咁細細力打老豆手臂話好過份, 個老豆就好冧咁係度傻笑:)
 坐車尾的好處, 在列車駛經彎道時, 可以從窗口看到蒸汽火車頭及整列火車
來到千頭, 今日唔駛趕住轉登山火車,可以慢慢同月台旁的Thomas & Friends 火車頭打卡
蒸汽火車好快就要接載另一批遊客返回新金谷, 臨出站前同佢影張全相先
係千頭駅外的食堂吃過定食午餐, 到千頭駅旁的SL資料館參觀, 就坐12:45PM的普通列車返回金谷, 再坐JR回到静岡已是下午2:40PM

返到静岡, 仲要等到下午4點先坐高速巴士返東京, 咁中間的時間就去咗静岡駅附近的Shizuoka Hobby Square睇模型, 静岡係田宮模型總部的所在地
門口就有高達同紅彗星迎賓
IJN輕巡矢矧, 陪同大和一齊走向IJN的末路.
IJN雪風... 阿叔唔係提督嚟, 唔識島風D姊妹
高達大戰三連星
静岡Shizhoka Hobby Square門口的招牌, 不知是否閒日, 成個場係我一個參觀, 反而賣模型的專門店就不時有客嚟購物.

是日開支:
JR 静岡 金谷 580 x 2 = 1160
大井川鉄道 蒸汽火車急行券 800
午餐定食 800
大井川鉄道 SL資料館 100

注意事項:
想坐SL蒸汽火車, 一定要買特急券指定席, 可以先行上網睇吓座位供應, 因為每日SL蒸汽火車只有一兩趟車, 而普通列車的車次也頗疏落, 都係嗰句, check清楚列車班次時間表, 同提早劃位

往返東京新宿<>静岡, 又快又平又舒適的方法就係坐高速巴士, 唔駛坐新幹線咁貴.
静岡>東京的高速巴士售票處同乘車點就係静岡駅前, 十分方便.



2018年11月28日 星期三

大井川鉄道, 奧大井湖上駅, 寸又峽

大井川鉄道, 静岡
奧大井湖上駅, 寸又峽
遊火車河+郊遊
難度: 無

今日去遊火車河+郊遊
一早從静岡坐半小時JR到金谷, 在金谷的大井川鉄道車站買了兩日的套票, 跟住坐9AM出發的昭和時代老爺電車, 沿著大井川到千頭, 再轉乘登山小火車

 昭和時代的老爺電車中
 大井川
 係千頭換乘登山小火車 10:20AM
 從千頭出發時登山小火車只有十來個乘客, 本以為閒日應該冇乜遊客, 點知到了下一站見到月台上過百阿公阿婆大叔師奶的日本旅遊團等著上車, 一下子把小火車都塞爆了, 座無虛席.
 中途經過換火車頭同水壩, 大約一小時後來到奧大井湖上駅 11:23AM
 單身9對此無感
 秘境 ~ 奧大井湖上駅
 剛才上車的日本旅行團都在奧大井湖上駅下車, 經過鐡道橋回到對岸, 再在隧道口旁爬樓梯回到山頭後面的停車場坐旅遊巴
 本來特意讓旅行團先行, 過橋來到隧道口已追上仲係樓梯慢慢爬的龍尾
 湖上的鐵道橋
 湖上的鐵道橋
 跟著爬過旅行團頭, 急步行到火車站對岸公路上, 就見到奧大井湖上駅座落在湖中的半島上
 奧大井湖上駅, 跟著坐11:56的巴士回千頭方向, 趕上中途12:10PM在奧泉轉巴士到寸又峽, 否則就要先回千頭等下一班1:20PM去寸又峽的巴士
 12:40PM來到寸又峽, 先在巴士站所在的小村茶屋食個野菜soba午餐
 然後就慢慢沿著林間公路行去寸又峽, 因為正是紅葉季節, 荒山野嶺中一路上都是遊客
 中途要過隧道
 出了隧道從水壩的樓梯往下走, 跟著便見到寸又峽的吊橋
 有個阿伯負責控制人流, 不時用大聲公指導過橋遊客前進/回頭的時間, 在等過橋時聽到女聲廣東話大叫好驚驚, 原來對面橋上正有兩對應該是香港來的情侶在過橋回來
 過完橋後要順著石級往山上走回林間公路, 在山坡上回望寸又峽吊橋和藍色的湖水
 原來個山坡叫苦勞坡, 唔怪得行到D日本大叔師奶咁辛苦啦!
 回到對岸山上的公路, 要沿著公路繞個大圈先可回到隧道口同水壩
 反正有時間, 見而家人少咗, 又落去行多次吊橋, 不過只有單身9一名, 完全無法感受到其他一雙一對過橋情侶所體驗的吊橋効應
 行返出村口巴士站, 先去浸過温泉才坐4PM的巴士回千頭
 寸又峽的公眾温泉美人之湯
晚上7PM前回到静岡, 在火車站商場吃了個立食寿司, 回到珈琲館旅店, 梗係要試吓D珈琲掂唔掂

是日開支
JR 静岡 金谷 580 x 2 = 1160
大井川兩日乘車券 4400
山菜soba 800
寸又峽美人之湯 400



2018年11月27日 星期二

富士五湖 河口湖, 精進湖, 本栖湖

富士五湖 河口湖, 精進湖, 本栖湖

今日係遊巴士車河同散步

 係河口湖駅前的民宿住咗2晚,早餐十分豐富, 食飽先出動
 早餐係咁樣的
 昨日下午天陰多雲, 今日就晴空萬里, 一早河口湖駅前巴士站已大排長龍
 坐紅線巴士9AM頭班車去紅葉回廊, 睇吓D遊客睇紅葉, 人類觀察, 都係一種旅遊活動嚟
 跟住一路行去長崎公園, 芒草+河口湖+富士山
 長崎公園, 芒草+河口湖+富士山
 長崎公園沿著湖邊步道行去大石公園的河口湖自然生活館, 紅葉+河口湖+富士山
花~波斯菊
 花~波斯菊
 紅葉+河口湖+富士山
 係河口湖自然生活館的小攤買了個期間限定雪糕, 天寒地凍晒住太陽望住富士山食雪糕

行咗一個鐘多點就來到大石公園, 夏天時這裡種滿各種鮮花讓遊客係富士山下的花田中打卡呃like, 不過而家係秋未, 乜花都冇, 只見花王忙著整理花圃.

大石公園一大早便來了好幾團大陸遊客, 十分熱鬧引人注目, 當中一班高幹樣子的大叔大媽見到富士山表現十分興奮, 少不了要拍照留念, 仲要攞埋手機出嚟拍片, 一邊擺post一邊大叫甚麼相約富士山, 見證新時代, 不知是要在日本國土上要見證哪個新時代呢?

係大石公園玩到10點半左右便坐巴士回河口湖駅, 回到民宿取回背囊, 再坐11:30AM出發的藍色巴士去精進湖
 中途巴士駛經筆直穿過富士樹海的公路, 沿途車都唔多架

本來諗住去到精進湖村食午餐, 12:10PM落咗巴士行到餐廳門口只見烏燈黑火, 原來今日休息, 跟住在村裡走了一圈, 理所當然係水盡鵝飛, 人影都唔見到個, 去到諏取神社看了一吓, 本想去找精進湖觀光案內所, 但只找到空地一塊, 連觀光案內所都消失了, 只好沿著公路沿湖走去睇子抱富士, 那裡有幾間民宿及cafe, 應該會有嘢食啩?
精進湖 12:30PM 子抱富士

子抱富士這裡, 都有些日本遊客開車過來遊玩, 也有些露營友在野餐, 但是公路旁的民宿和餐廳全部都關門休業, 真係估你唔到

咁卡又打完, 冇飯開, 唯有等巴士去本栖湖, 不過下一班巴士仲要等成個半鐘...

研究完個巴士站牌的時間表, 發現有班巴士從富士宮開往河口湖, 咁就坐這班巴士回到精進湖公路入口的赤池, 剛才坐巴士經過見到那裡有間食堂仲有開門.

 等巴士時影的, 芒草, 精進湖, 子抱富士, 等到1:15PM先有巴士

去到赤池食咗個定食, 跟住坐2:15PM的藍色巴士去本栖湖

成架巴士就只有兩個乘客, 個巴士司機仲係今早同一位哥仔, 本栖湖車站旁邊仲有兩間民宿同商店餐廳營業, 遊客也比精進湖多點
 一路走到本栖湖邊的露營場, 湖邊見到有人在影結婚相
 雖然還未到3PM, 但是因為太陽西下所在位置落入山下陰影中, 沒有日照加上寒風, 寒氣襲人, 都係走為上著
 回到巴士站等3PM由河口湖發車到富士宮的快速巴士, 車站仲有一位日本大哥等車去河口湖, 旁邊民宿商店的嬸嬸仲好好心問我去邊, 怕我搭錯車
 巴士全程又係只有兩個乘客, 阿伯司機開著巴士沿著富士山西邊的公路頭文字D般狂奔往静岡海岸俯衝下山, 3:40左右便來到富士宮駅, 真係唔知巴士公司點維皮

跟著坐JR去静岡, 中途在草薙下車去草薙之湯浸温泉, 玩到晚上7PM先來到静岡
 Aoba Symbol Road, 青葉シンボルロード, 七間町, 静岡市

是日開支
富士周遊巴士兩日乘車券 1500 (昨日已買)
大石公園的雪糕 500
巴士 精進湖 >赤池 230
赤池 定食 1080
巴士 本栖湖>富士宮駅 1320
JR 富士宮>富士>草薙 740
草薙之湯 700
JR 草薙>静岡 500

注意事項:
秋未超淡季, 精進湖冇餐廳開門, 請自備粮水去野餐
精進湖冇coin locker
本栖湖有民宿及商店餐廳營業
去精進湖/本栖湖, 預早查好巴士時間, 除咗1日4班車的藍色周遊巴士, 仲有要另外付費的一般巴士往返河口湖<>富士宮/富士, 不過班次同樣疏落.