今次又係日帰登山, 百名山西穂高岳嘅西穂独標(2701M)
西穂独標(2701M), 前方為西穂高岳
一早係温泉旅館嘆返個朝風呂後, 食埋早餐就出發坐巴士去新穂高高空纜車站, 去到纜車站先搵coin locker放好行李, 再去售票處換埋纜車飛, 本來諗住仲未到發車時間, 就想落返地下商店睇吓有冇登山紀念章賣, 點知見到職員叫客人排隊準備入閘, 原來就算未夠鐘但多人排隊都會有加班纜車上山, 咁就梗係跟大隊上山先
新穂高高空纜車(升級版)
上到白樺平站排隊等上新穂高嘅雙層纜車, 前面有一個泰國旅行團在排隊, 想來位於東南亞熱帶嘅泰國人好少有機會坐纜車上到2000米海拔嘅高山, 所以呢班泰國遊客未出發先興奮, 十分hyper.
記得我之前都坐過兩次新穂高纜車, 一次係4月睇雪山, 另一次又係10月初, 不過嗰次就唔夠時間冇行到去西穗山莊, 今次再坐新穂高纜車, 發現疫情後換咗新車, 現代感十足
新穂高纜車頂上站, 日本最高郵筒(2156M) 
今朝幾好天, 萬里無雲, 風和日麗, 適合登高打卡, 對面為笠ケ岳連峰 
全新打卡位, 凌空網橋[槍之回廊] 
阿公阿婆先最有童心, 勇於嘗試
上到新穂高頂上站, 先到屋頂個全日本最高郵筒(2156M)打過卡, 然後落返去同一班日本大叔大媽行山友一齊填登山界, 填好就出發去西穂高登山口, 中途經過新打卡位網橋[槍之回廊], 見到一眾大叔大姐童心滿滿咁踩上網凌空打卡, 行過路過, 不要錯過, 咁當然又要過去打下卡先
西穂高登山口, 日本姐姐full gear單拖去camping行山 
西穂山莊, 可以坐係戶外食拉麵 
小歇一會, 就繼續登高, 往西穂丸山出發
沿著山脊林木山道行咗一個鐘左右就上到西穂山莊(2367M), 一早已有些行山友喺度食緊拉麵, 咁我都小休一會食返條士力架先再繼續上山, 嚟到西穂山莊已高過林木線, 進入高原植坡地帶
離開西穂山莊, 已經超越了高原林木線, 頓時視野無阻, 群山一覽無遺 
登上西穂丸途中, 前方已可見到西穂連峰
行咗20分鐘左右就上到西穗丸山(2452M),
之後就沿著山脊線行上西穂独標, 開頭還是一些易行的碎石山道, 前方是穂高連峰, 後邊是燒岳, 左邊是笠ヶ岳, 右邊下方是上高地,
來到山稜線上原本明顯的山道慢慢變成攀石, 開始有些位置是要手足並用才能翻過, 由行山升級成爬山,
由西穂山莊出發行咗約一小時便登上西穂独標(2701M)
對面是笠ケ岳連峰, 對於喜歡full gear重裝才安心嘅日本登山友嚟講, 這位輕鬆上山的日本哥哥仔十分出眾
話咁快就到咗西穂丸山, 前面就係今日嘅主角, 西穂独標
過了西穂丸後的碎石山徑, 才到達山稜線 
在山稜線上的山徑望向西穂高岳 
右邊下方的山谷就是上高地 
在西穂山稜線上回望燒岳
西穂高連峰, 中間的石頭山是西穂独標, 左邊尖峰是西穂高岳, 遙遠可見独標頂上已有登山友在擺post打卡 
咁先似行山 
西穂独標, 排隊攀石中, 請耐心等候
西穂高岳独標(2701M), 哥仔一馬當先進佔有利位置打卡, 遠方的笠ケ岳已在雲霧中 
日本夫婦輕輕鬆鬆拍拖登山, 前方為穂高連峰
西穂独標往前再爬約1小時多點就可以西穂高岳, 不過往前就是認真行山友嘅領域, 出發前記得要帶返個頭盔, 因為一路係山上塞人排長龍, 爬上爬落時隨時會有落石掉下中頭獎, 咁我呢D日帰hea行嘅行山友, 打完卡食埋條Mars朱古力就好快D落山, 唔知點解今日又唔係日本假日, 但成山都係日本行山友, 一早便有不少人從對面嘅奧穂高岳行過嚟嘅, 西穂独標係佢哋穂高連峰縱走嘅終點
組隊嚟縱走嘅日本後生仔女, 戴定頭盔整裝出發挑戰穂高連峰 
前面是西穂高岳(2909M), 之後是手足並用嘅攀石爬山, 輕裝前來嘅日帰登山友要到止卻步
返回西穂山莊正好係lunch time, 點都要幫襯吓食返碗拉麵先落山坐纜車, 中途遇到一對老外夫婦帶住兩個細路, 一家四口中午過後才登山, 問我仲要行幾耐先到山屋, 咁我見佢地行到索晒氣, 就回答話仲有一半路就可以到山屋嘆凍啤同可樂, 佢哋即時生猛返晒, 健返步如咁快衝上山
西穂山莊午餐, 拉麵1000円, 十分良心價格
行完穂高連峰,落到纜車站的森林公園也不忘打卡
落到山腳見仲有時間, 就去纜車站對面嘅穂高飯店浸吓日帰温泉relax吓, 先坐巴士返回高山市, 夜晚去食米芝蓮飛驒牛鋸扒