JR東日本wide pass可以連續3天任搭新幹線同特急列車, 既然今日係火車證最後一日, 咁就緊係又要坐吓新幹線用盡張pass, 發揮港豬怕蝕底賺到盡嘅獅子山下精神
早上坐1小時新幹線就來到輕井沢, 係北口出站後就排隊坐巴士到白糸之滝, 作為輕井沢的招牌名勝, 去輕井沢除咗去行吓步行街同外國教堂, 還有南口嘅outlet shopping掃貨外, 不少遊客都專誠去山裡嘅白糸之滝打吓卡, 之前上網睇相好似好靚, 點知去到現場...
 |
白糸之滝, 山長水遠入到嚟, 原來是一個人工瀑布
|
離開白糸之滝(Fake)後再行約半小時的林間步道, 便來到公路出口的峰之茶屋, 想當然淡季期間茶屋沒有營業, 茶屋對面馬路就是淺間火山的登山口, 在公路出口遇到兩個日本女生行山客問路, 問我是否從白糸之滝過來, 她們應是一早坐巴士直去小淺間山登山, 下山後見即時沒有巴士回輕井沢, 便再往下行去白糸之滝.
 |
| 也有其它遊客覺得畀人Fake了 |
 |
| 行了大半個鐘林間步道, 便回到峰之茶屋的公路出口, 這裡可以坐巴士返回輕井沢 |
 |
| 淺間山登山口, 相中的小山就是小淺間山, 從山腳望過去, 睇落無乜難度, 點知... |
從淺間山登山口出發上山, 便遇到三三兩兩剛下山的日本登山客迎面而來, 想來都是一早坐巴士, 又或是開車過來登山, 現在下山剛好可以回輕井沢吃午飯, 想來今天大部份去小淺間山的行山友都是趁著早上天色比較晴朗便趕著上山, 而我就因為諗住想趁早上有陽光時, 先去白糸之滝睇吓靚景打卡, 之後才再去小淺間山, 結果早上的行山友都行完落山, 才輪到我孤身一人登山
小淺間山是淺間火山東側山坡上的一座原是死火山口形成的山峰, 從登山口出發就只有一條林間山道, 去到山腰的分𡵨點, 往前行被封的山道是前去2500M淺間火山主峰, 從分𡵨點右轉則是前往只有1600M高的小淺間山, 大約行一個小時左右就可以登頂
 |
| 走了一會林道便來到分𡵨路口, 之後都是踏著火山灰爬坡 |
 |
| 費盡九牛二虎, 進三退二的努力, 終於來到小淺間山的西側山頂, 對面在雲霧中的就是淺間山 |
 |
| 山上是烏雲密佈山雨欲來, 南邊輕井沢市區卻是陽光普照 |
 |
| 在山頂上轉了一個圈, 終於來到真正的小淺間山山頂 |
 |
| 原來也有1655M高, 不過在9月底還是行到一身汗, 沒有太陽也有好處, 就是冇咁熱 |
 |
| 落山途中, 一路都是難行嘅火山灰斜坡, 只能放慢腳步小心下山, 千萬不要滑倒 |
因為2019年淺間火山噴發後一直封山禁止登頂, 連帶淺間山的旅遊業都一齊收檔, 主峰上不了, 咁唯有去小淺間山行吓, 本來諗住小淺間山是easy mode, 點知之後一路都是鬆散火山灰上陡峭難行的山徑, 就像在爬撒哈拉沙漠的巨形沙丘般, 費了一輪功夫才來到小淺間山的山頂, 這時頭上開始天陰多雲, 烏雲把旁邊的淺間火山都遮蓋著, 便趕緊在下雨前落山
回到登山口剛好錯過了下午1點左右經白糸之滝返回輕井沢的巴士, 下一班車可要等一個多小時, 峰之茶屋又沒有營業, 想吃個便餐就只像剛才那兩位日本女山友般, 走半小時返回白糸之滝巴士站的茶屋, 這時在巴士站牌看到一個告示, 說茶屋周圍還有另外幾個不同位置的巴士站, 原來除了剛才從輕井沢去白糸之滝的草輕交通的巴士外, 茶屋旁還有一個西武觀光巴士的車站, 剛好1點半左右便有一班巴士返回輕井沢, 而且還會路經星野温泉, 啱晒行完山去食飯浸温泉
 |
| 峰之茶屋 - 西武觀光的巴士站 |
 |
峰之茶屋(停業中) + 小淺間山
|
 |
| 星野温泉(好高級) |
 |
| 星野温泉村民食堂(一D都唔村民) - 吉豬定食 |
浸完温泉後坐巴士返去輕井沢, 中途在舊輕井沢下車, 正好就是步行街的入口, 還未到5點便已十分冷清沒有幾個遊客, 街上做遊客生意的店舖大都正在準備關門打烊, 我走到輕井沢作為夏季避暑渡假勝地的發源地舊教堂門口打個卡, 再去麵包舖本店買了個名物蘋果批, 本來仲諗住係舊輕井沢駅旁兩間新派名店其中一間食埋晚餐才回東京, 點知入夜後轉咗個為遊客而設嘅貴價餐牌, 見到咁嘅價錢, 還是決定坐巴士趕回火車站坐新幹線返東京食飯, 剛才入手嘅蘋果批剛好畀我在新幹線上當小食暫時頂下肚餓
 |
| 避暑地輕井沢發祥地的外國教堂 |
 |
| 輕井沢麵包名店 |
 |
| 東京駅 |
 |
| 復修後重開的東京駅, 彷彿回到舊日本帝國明治時代 |
 |
| 係上野人氣迴轉寿店勁食寿司 |
東京舊車站重開多年都仲未去過, 今晚就一直坐到東京終點站先落車, 係東京駅外打過卡, 又去遊客中心睇下, 先再坐在來線返回上野食人氣寿司, 行山浸温泉食好西, 咁又完成美好的一天
星野温泉 蜻蜓之湯 1320円
