返鄉下5 神戶海洋博物館, 明石大橋, 孫文記念館

呢10年間去咗咁多次関西, 京阪神之中, 就只有神戶冇乜去過, 之前去神戶主要都係去有馬浸温泉, 六甲山睇夜景, 異人館唔覺得好特別, 反而UCC咖啡博物館仲有趣

咁早幾日又去有馬浸温泉, 中午順路都走咗去神戶外圍嘅白鶴酒造資料館見學, 順便係三宫食埋炸和牛午餐先入去有馬, 話時話真係未食過神戶和牛, 反而但馬牛, 飛驒牛, 近江牛, 宫崎牛都食過, 枉我仲話去過咁多次関西旅行

白鶴酒造資料館

今日就用KTP坐阪急去神戶, 先去神戶港嘅海洋博物館兼川崎世界參觀, 從元町行路約15分鐘去到海邊神戶港公園, 梗係打返個卡先

打卡位 - BE KOBE

打卡位 - 帆船


打卡位 - 奇怪嘅地標, 仲有潮人去嘅星巴巴, 後面就係海洋博物館, 館前空地正舉辦旅日越南人嘅春節市集, 都好熱鬧吓

今日星期六撞啱海洋博物館聯乘TV兒童節目[博士ちゃん]舉辦嘅[君も博士になれる展empowered by 博士ちゃん], 一早便吸引大班家長帶著小朋友排隊入場, 輪到我入門口時, 賣入場券嘅大叔問我係咪要買[君も博士になれる展]嘅套票, 我話唔駛啦, 普通門票就得啦, 心想點睇我一條單身9都唔似係會帶埋小朋友嚟玩遊戲嘅老豆樣

神戶海洋博物館話就係介紹神戶港自明治維新時起, 至二戰後復興現代日本GDP大爆升嘅歷史, 但係最引人注目的還是館內各年代造工精細嘅船艦模型, 非常值得一看

一入場便見到一隻巨形帆船模型

造工十分精細嘅帆船模型, 18世紀嘅Man O' War

仲有初代[大和]鐵甲艦

點少得[鐵達尼]

IJN戰艦陸奧

睇完海洋博物館嘅展覽, 之後仲有同館川崎重工嘅川崎世界, 川崎重工以神戶為基地, 自明治維新起便是日本重工業發展嘅主力企業, 從造船, 蒸氣火車頭, 二戰時嘅戰機軍艦, 到現代嘅電車, 新幹線, 仲有招牌形仔電單車

今日周六便遇到大批家長帶著小朋友來遊玩, 仲有一班大叔老爸們興致勃勃咁排住隊同TopGun靚佬湯架電單車打卡, 仲要勞煩老婆仔女幫佢揸機擺靚post影靚相, 我諗陪佢哋一齊嚟嘅老婆仔女, 咁耐都冇見過佢哋老豆好似細路見到心愛玩具, 咁超hyper, 超興奮嘅返老還童樣

初代機械臂, 幾十年前日本工業自動化已是大佬級

Gas Turbine 切開模型

其實電單車先至係主角

經典車款

TopGun戲內靚佬湯架電單車, 一班日本中年老爸專程前來打卡, 老婆同女都不明白點解老豆可以咁high

大人(老豆)細路一齊玩, 幾開心

畀部真機你騎, 好玩過機舖打機, 老母就忙住同老豆仔仔打卡

日本小朋友利用電車Go完美示範如何精準埋站

仲有初代新幹線真車頭畀你去玩模擬車長

跟住中午返回元町商店街食和牛西餐, 然後再坐神戶高速私鐵去明石大橋

好好食嘅和牛西餐

顧名思義, 明石大橋就係連接明石市同淡路島嘅跨海大橋, 大橋基座旁有一間橋的科學館介紹明石大橋嘅建築過程, 大橋基座仲可以搭電梯到吊橋底下嘅舞子海上散步道, 可以在半開放嘅橋下行人道上吹海風打下卡

舞子公園明石大橋@橋之科學館門口

明石大橋橋底, 對面就係淡路島

舞子海上步道, 好大風, 吹到頭髮亂了

舞子海上步道, 係大橋底下兜個圈

有一小段裝了玻璃地板, 畀遊客試吓膽

舞子海上步道的展望台, 啱晒情侶嚟打卡

從舞子海上步道望向神戶方向, 下面嘅洋宅就係孫文記念館

明石大橋橋底, 有冇見到剛才行過嘅海上步道呢?

明石大橋, 夏季仲可以參加見學登上橋塔頂, 不過聞說因為武肺而停辦了好一段時間了

玩完就返回大橋旁嘅舞子公園, 係海堤角落有一座移建復修嘅日式洋館[移情閣], 現今則是[孫文記念館], 移情閣前身是明治時期日本華僑富商嘅海邊真豪宅, 百年前海外不少華人都曾出錢山力支持革命黨去推翻滿清建立共和, 1913年革命成功後第二年, 已貴為國父嘅孫文再次訪日, 神戶嘅華僑富商就係移情閣舉辦歡迎會宴請孫文, 都算係到此一遊