2018年5月26日 星期六

荒島岳 (日本百名山)

荒島岳
1523M
百名山
福井 越前大野
初夏登山
時間: 6小時 (連休息)
難度: 中, 全程直上直落, 登山落差1200米, 要有充足體力

2018年5月尾去咗福井荒島岳登山, 從京都坐JR在來線快速列車轉咗幾次車先到福井, 中途可在長浜/敦賀遊覽同食飯, 雖然比坐特急稍為多花點時間, 但可以中途落車遊覽及食飯休息, 仲要比坐特急來回平近一半, 又無必要買JR北陸pass咁貴.

早一日到福井在獨此一家的民宿入住, 第二天清早老闆開車送我到福井駅, 坐6:30AM出發的電車到越前大野.
6:30AM發車的越前大野-九頭竜線(越美北線)
紅色的單卡電車...應該係柴油火車, 清早只有幾個乘客
火車7:30AM到達終點越前大野, 如要從福井坐火車直達荒島岳登山起點的勝原駅, 就要等到9AM先有火車, 10:30AM先到, 咁就唔夠時間行完山再到越前大野遊覽, 所以先坐首班火車到越前大野, 再轉乘地區巴士到勝原駅
越前大野以泉水聞名, 城區有些泉水可供飲用, 咁當然裝返D天然泉水一陣行山飲
所謂地區路線巴士其實是一架面包車, 8AM出發, 8:20AM左右到勝原, 今早只有幾個乘客, 上車時司機伯伯問各乘客係邊度落車同收車資, 只有我同一個日本大叔係去勝原行山, 另外有兩個大叔拿著魚杆, 應該係中途其他站落車去九頭竜川釣魚
係勝原駅落車, 要沿著林間車道走回公路先到登山口, 中途行經林間車道時, 竟然老遠見到前路有一隻小黑熊, 熊仔見到有人即時跑回路旁的森林裡, 有熊仔, 即係有熊媽啦! 咁我就企定定等埋後邊的日本大叔, 同佢講剛才見到熊出沒, 先一齊行去公路, 多個人行應該會安全D?

來到勝原登山口, 見到停車場已泊滿車, 仲有大班日本大叔師奶行山友排隊去廁所同寫登山届準備出發, 咁我見到停車場有販賣機, 見今日咁熱, 又買多支凍水上山
搞吓搞吓, 8:40先正式從勝原登山口起行, 一開始便是一條筆直的斜路, 聞說以前勝原有一個滑雪場, 所以仲有一片大斜坡留係度, 後來有些義工自資修建了一條水泥路方便行山友
大直路一路上斜中
水泥路終點開始是普通山徑, 往下望可見起點的停車場和民宿,山坡上仲有個阿婆係度摘野菜
行咗約半小時山路就會經過以前滑雪場索道的轉盤遺跡
之後先至係荒島岳登山口9:15AM
跟著行咗半個小時山路來到山腰,有一處展望點可以看到白山, 不過俾樹遮晒, 乜都睇唔到
沿路係不停咁上坡山徑, 不時係這種樹根梯級
10:40AM從登山口出發不停的爬坡, 行咗大約1小時左右來到海拔1204M高的分歧點, 一邊往小荒島岳同[中出]登山口,一邊往荒島岳主峰, 距離山頂仲有1.5KM
路標~唔好睇錯成[山頂中出]
滑落注意!
有些山徑比較陗陡, 要用手拉著鐵鏈爬上去
11:20AM從剛才的分歧點行咗約半小時終於走出樹木線, 見到山崚線, 山坡上仍有殘雪未溶
仲有412M就到山頂呀!
從山徑回望, 可見遠方白色積雪的白山
11:30左右來到山頂的小神龕
從荒島岳山頂可以看到山下的越前大野平原
山頂上起碼有過百人在休息午餐, 應是一早開車過來登山,當中主要都是年青男生, 至於阿伯師奶行山團仍在後面努力登山中
有人仲帶埋小朋友嚟行山, 假日親子行山樂
荒島岳 1523M, 前方是白山
山頂上大班行山友在野餐中, 不亦樂乎
12PM開始落山
沿來路下山, 今日天色不錯, 登高望遠, 只係烈日當空, 日曬下意想不到咁熱, 汗好雨下, 好在先前在山下多買了支凍水
又見到剛才的路牌~中荒島岳1420M
行咗約2小時, 話咁快又回到起點上山的大直斜路, 彈吓彈吓就追過前面的日本哥仔回到停車場. 先前係山徑落山時日本哥仔健步如飛, 從後一嘢就過咗我, 咁係大直路見我彈吓彈吓咁快步落山, 不知如故佢又跑起來衝落山, 點知開跑咗幾步佢就一個不小心PK了, 啪一聲扑倒在石屎路面上顏面落地, 跟住好似乜事都冇發生過咁彈返起身, 見到都痛死人.
出咗停車場後沿著公路走回勝原駅, 中途有一處高速公路鑽隧道的工地, 有新海誠設計的廣告牌, 工地門口的保安大叔認得我剛才經過, 仲同我打招呼, 阿叔我唔識日文, 口啞啞唔識點應機
2:30PM 勝原駅等火車回越前大野
2:45PM 又係今朝架紅色火車, 上咗車又遇到今朝一齊落車行山嗰位日本大叔, 不過佢係另一邊落山, 早一個站越前下山駅上火車
在火車內回看荒島岳
火車沿著筆直路軌越過越前大野鄉郊
下午3點左右返到越前大野駅
同其他日本鄉下城鎮一樣, 街上人影都唔多過, 一路行到市中心一間coffee shop食個cake set, 扮吓文青嘆返杯凍珈琲先
今日突登預留時間去越前大野, 係専登去南部酒造場的花垣買清酒, 大野以地下泉水聞名, 當地釀造出不少高質的日本清酒
因為時間關係, 今日冇時間走爬山上去越前大野城, 回到火車站時經過一間神社, 裡面有D好得意的狗仔繪馬
坐恐龍火車返福井4:50PM
坐恐龍火車返福井4:50PM
不過係中途落車, 去某鄉下浸温泉先再返福井
JR市波駅, 之後要行路20分鐘左右去美山森林温泉, 個温泉真係喺森林裡邊, 一邊浸一邊望住樹林, 好過癮吓.
晚上8點左右返到福井, 連月台地下等車的劃線都以恐龍為主題
跟住係駅前商店街的食堂食返個唐揚定食當晚餐, 抵食夾大件, D炸雞仲好好食
是日收獲: 花垣大吟醸40, 好正!
(p.s. 2019年一田都有得賣, 不過嚟到香港就貴一倍有多)


是日開支:
JR 福井 越前大野 670
巴士 越前大野 勝原 400
JR 勝原 越前大野 240
cake set 1020
花垣大吟醸 1296
JR 越前大野 市波 320
美山森林温泉 510
JR 市波 福井 320
晚飯定食 900

注意事項:
 越美北線到九頭竜湖一段的車次疏落, 請查明巴士及列車班次
荒島岳登山上下落差甚大, 甚耗體力, 請帶夠糧水, 及請預計6-7小時方能行畢全程
 如利用JR前往荒島岳登山, 可利用勝原駅及越前下山駅進出
 勝𠩤駅有前往白山及九頭竜湖的巴士來往越前大野駅
 越前下山駅旁有九頭竜温泉, 係日本秘湯
越前大野以泉水聞名, 除了買清酒外, 市內也有錢湯以可浸浴