宮崎 青島 鵜戸神宮

宮崎青島

一早從別府坐JR到大分, 因為JR南九州pass只能使用大分以南的路線, 所以要出一出閘機, 再用JR pass入閘, 坐特急指定席去宮崎, 在大分駅等火車時, 見到超市開門就順便入去買個牛肉便當等一陣係上火車上食, 入閘前又發現一家迷你牛角包店好吸引, 呢間迷你牛角包店係JR博多總店長期大排長龍, 難得見冇人排隊又手多多買咗幾隻人氣牛角包上車食.

早上走去JR別府駅中途, 經過洋館風格的駅前高等温泉, 聽聞還可以留宿

JR大分駅

特急火車上食和牛便當, JR pass可以劃位坐指定席, 跟著3天日日都坐JR, 值回票價

大分至宮崎火車中途窗外的太平洋風光

去到南宮崎再轉普通列車去青島, 咁咗又撞正下午嘅放學時間, 要同一班中學生一齊迫火車, 差些少就迫唔到上車, 要是錯過咗呢班車就要遲成2個鐘先到青島, 所以點都要迫上火車, 難得這班只有一卡嘅火車由車頭塞爆到車尾, 阿叔揹住個背囊同班中學生一齊迫火車, 感覺就好似返回以前中學放學時迫巴士返屋企咁, 深感歲月不饒人, 實在是感觸良多.

宮崎日南海岸的青島Hostel, 有床位同温泉, 旁邊就是海灘同青島, 門口就是巴士站, 十分方便

雖然話係因為要避開梅雨季節嘅雨帶而改咗去九州東岸, 但係在6月尾烈日當空下, 晒住太陽係九州南部嘅鄉下由火車站行去海邊嘅旅店, 不用一會就行到周身大汗混身濕透, 這時又諗返起天陰陰清涼爽嘅好處, 行去到海邊嘅青島Hostel, 但係仲差D時間未夠鐘check in, 就先把背囊放係前台, 又晒住太陽行去附近一家7仔的自助售票機買宮崎巴士一日券, 然後又要行返去hostel門口坐巴士去鵜戸神社

青島hostel門口就有巴士去宮崎市, 鵜戸神宮同日南市, 對面還有餐廳同超市

趁巴士還未到, 先到海邊睇下, 沿著海邊步道走過橋便是青島, 藍天碧海, 陽光熾熱, 感到夏天來了

本來計劃今日只在青島海邊hea吓, 明早先去鵜戸神宮, 因為上午陽光先可以照亮藏係山洞裡面向太平洋嘅神宮本殿, 不過反正都已被太陽高溫熱到身水身汗, 就直接坐巴士日南海岸遊車河, 玩完先返青島hostel浸温泉

日南海岸遊巴士車河

沿途經過堀切峠, 可以看到海岸邊上的鬼之洗濯板

水清沙幼的海灘

坐巴士途經日南海岸的堀切峠, 一路上看著蔚藍的太平洋同鬼之洗濯板海岸地貌, 沿途還有很多主打伊勢龍蝦的海鮮食店, 來到鵜戸神宮巴士站落車, 仲要行一會石階及穿過一條隧道才可來到神宮入口, 如果是自駕就可以直接開車到神宮入口前的停車場省了一大段路

從巴士站走到鵜戸神宮中途不時會見到快要被太陽晒乾的紫陽花球

中途還要穿過一條隧道, 入內即時感到風涼水冷, 有如天然冷氣好讓遊人降降溫

話咁快就來到神宮正門

之後再走下一段石階就來到海岸崖壁底下天然洞窟內的神宮本殿, 在神宮參拜後再買了一個御守, 又有樣學樣學日本遊客丟運玉到龜石去試吓運氣, 玩了一會就回到巴士站等車回去, 想不到等車的幾個大叔大姐全都是香港遊客, 也有幾對港人遊客在巴士站停車場開車離去, 反而日本遊客只有小貓三兩, 不少旅遊景點的香港人比日本人還要多, 也許是本地遊客大都是在早上有日照時才來參拜的吧!